ናብ ዓርከተይ

ደብዳቤኻ ኣንቢበዮ

ካብ ስግር ባሕሪ ዝሰደድካዮ

በል ሕዝ

ካብቲ ኩሉ ንሓንቲ ክምልስ፤

ሕቶኻ “ከመይ ኣለዉ ስድራ᎒”

ደብሪ ነቕኒቕካ ግዝፊ እምባሶይራ

ስድራዶ ኢልካ᎒!

እቶም ክልግሱ ኢዶም ዝቖርጹ

ኣፎም ገዲፎም ዘኾልሱ

ረጊሞም ዘብጽሑ ጸልዮም ማይ ዘፍስሱ፤

ዝለምለመን ዝመቀረን

እንቛቑሖ ኣርሕን ልግዐ ብተይን

ቅድመይ ንውሉደይ ዝብሉ

ንሶም ደኣ ኣዕቢዮም ኢዶም ከይተፈድዩ

ምንባብ ደብዳቤ’ኳ ከይከኣሉ

ገጽ ከባብን ንፋስን ኣንቢቦም ዝጸሩ

ኣለዉ ከይተዛረቡ ውዒሎም ይሓድሩ!

ብልጭ-ብልጭ ምስ በለ በርቂ ጥፍኣት

ህቦብላ ፈረስ ተሰቒሉ

ተሓምበለ ክብል ተዃሉ ኣኸቲሉ

ንዓኻዶ ምንጋሩ ተደልዩ

ገጽ ስድራ ንእለት ዓሚሉ።

ኣነ ድማ፡

ገጾም ይጥምት የፍርሃኒ

ዘረባ ኮይኑ’ሎ ብቕርኒብ ዓይኒ፤

ከይተዛረብኩ የንብብዎ ገጸይ

ንጠማመት ኣለና ዓርከተይ፡

ይምስሉ ከኣ’ባ ረሲዐልካ፤

“ዓርከትካ ክፍለ ፍቕሪ ቅበር

ውሉድካ ክፍለ ሃብቲ ቅበር”

እንከለኹ ምስኦም

ኣብ’ቲ ግርማ ገጾም ሃንቀውታ ይንበብ

ኣብቲ ቅርኒብ ዓይኖም ለውሃቶም ይሰርብ

እናሻዕ እምህለል ከይፈልጡኒ የምስል።

ቅርኒብ ዓይኖም ዘዋህለሎ ሰርቢ

እንተዘኒቡ ምእባድ ከይኣቢ

ዓይኒ ምስ ዓይኒ ኣይንጋጠምን

ተስፋ ከይስእኑለይ ኣይደንንን!

ንናሕሲ ህድሞና ብዓይኒ ይኸዶ

ከምዛ ዘይፈልጦ ይጥምቶ

ሓርከሙን ሰርዉኡን ይፈቓቕዶ።

ከመይ ኣለውዶ ኢልካ᎒

ከምዘይክወን የለን ተኻዊኖም

ነዚ እምባ ብመርፍእ የሕሊፎም

ይጥምቱኒ ኣበሪኾም

ከይሽቑረር ብኢዶም ደጊፎም

ጥሪት ዓዲ ክሕሉ ክሓቁፍ

ጭርናዕ ከይለግብወን ንኸናግፍ

ብቕናቶም ይሰርሑለይ ወንጭፍ።

ኣነ ድማ፡

ትርጉሙ ይኸብደኒ ብዘዘው ይዕዘም

በዓል ቀርኒ ህይወት ንሕልፈት ዝቕድም

ኣንጎልሒጡ እንከሎ ዘይሃድም ሕሰም

መዋእል ይቖጽሩ ምሉእ ተስፋ ሂቦም፡

(ንርፍራፍ ቅራፍዶ ምተረኽቦ መግደፍ

ብጨው ደፍደፍ ጠርቆም ኢልካ ሕለፍ)

ተጻዊሩ ከርሲ ስድራ

ኪኖ ሕርሲ ዘሎ መከራ ከም መረቕ ዝስተ ከርተት

ኣብ ገጾም ዘሎ ድርሰት፤

ስእሊ ባቡር ሓዲዱ

ውቑር መጥሓን ምስ ሓዲዱ

ቅርጺ ትኮም ንልቦም የማዕዱ

ሑዕ ከይበሉ ሰዓል ዘሰንብዱ ።

ንሶም ከይቆሩ ምስኦምየ ዝመክር !

ናብራ እዛ ዑንቂ ዓይና ከተስርር

ንዓኣ ሶሊኽካ ራህዋ ንኽትፈጥር

ብዓይኒ መርፍእ ሕለፍ እንተ ኢሎም ተ ኣምር

ብሓንቲ ለይቲ እየ ናብ ፈትሊ ዝቕየር

እንሆ ድማ ጾር ክልተ ከራግፍ

ዓይኖም ርእየ ብዓይኖም ይሓልፍ

በል ከምዚ ኢና ምስ ስድራ ነሕልፍ

እናተናበብና ኣለና ኣይትሰከፍ!

መለስ ንጉሰ