ነዊሕ ይገብር ኣነን ሓወይን
ዘይንፈላሊ ከለና ክረምትን ሓጋይን
ትንፍትት ኢልና እናተጻወትና ያላኻ
ዕንጸይቲ ከነምጽእ ወፊርና በረኻ
ሓላዊ ዕንጸይቲ ከይርእየና
ደሓር’ውን ከይመስየና
እናፈራሕና ጉያ ወሲኽናሉ
ሓወይ ጎኒ ጎንኽ ውዒሉ
ኣብ ወዮ በረኻ እክብ ዝወዓልኩዎ
ብሓይሉ ተሰኪምዎ
ግደፍ እናበልኩዎ
ኣብቲ መዳራጋሕ ጎቦ
ከመይ’ለ’የ’ሞ ደፊረ ክዛረቦ
ቁሩብ ምስ ከድና ግን ዕንጸይተይ’ባ እንተበልኩዎ
ከየውጽአ ዘረባ
ከብቲ ገረብ ልሕጺ ልሒጹ
ሓመድ ኣስሒኑኒ ተጸዊጉ ገጹ
ሽዑ እዚ ኩሉ መንገዲ
ቃል ከየተንፈስና ኣቲና ዓዲ
ከዋኽብቲ ምውጽኦም ልባ ተመሊሓ
ኣይደይ ትጽበየና ኣብ ግዳም ጸኒሓ
ርእይ እንተበልኩዋ ውዕሎይ ኣርሚሙዋ
ዕንጸይተይ እናበልኩ ብኽያት ስዒሩኒ
ንሳ ኸኣ ከም ዘሕደገኒ ፈሊጣ
ሓጊዙ’ኳ እንዳኣሉ እንካ’ሞ እዚ ጣይታ
ኣቱም ዓያሹ
ኣሕዋት’ዶ ይበኣሱ
እናበለት ንኺኒኽታይ ሰሚዓ
ከተቕስነኒ ያኢ እናሰሓቐት ነቢዓ
ጽውግ ኢላ ከይትገንሖ
ካብ ማህጸና ወጽዩ ንወዳ ትፈርሖ
ንሱ ደኣ ብድሕሪኡ’ዩ ሰዊዱ
ምህራመይ ኮይኑ ልማዱ
ምጽጋብ ስኢኑኒ ኮይነ ክሳብ ዝደሚ
ኣይተዓረቕናን ጨኪኑ’ዩ መስለኒ
ይቕረ’ኳ ዘይበለለይ ክሳብ ሎሚ።
ተስፊት የውሃንስ
ዓዲ እንግሊዝ
