ስውእ መምህር ይስሓቕ ኣብርሃም ሓደ ካብቶም ኣብ ዓውዲ ሙዚቃ ሃገርና ዓቢ ኣበርክቶ ዝፈጸሙ እዩ። ንመምህር ይስሓቕ ብቐረባ ክፈልጦ ብምኽኣለይ ካብቲ ዕድለኛ ዘብለኒ እዩ። ኣብ ሓደ ዎርክሾፕ ብዛዕባ ትምህርቲ መዋእለ ህጻናት ኣብ ዝዘተየ ኢና ዝተራኸብና። ሽዑ ከምዚ ክብል ተዋዝዩለይ።
“ሕማቕ ኢሳቕ የለን ይብሉ ኣባ ኢሳቕ። ስለዚ ኣይትሕመቕ!”
መምህር ይስሓቕ ምስ ብዓልቲ ቤቱ ኣብ ፓራዲዞ (ስታውያን) ኣብ ዝቕመጠላ ዝነበረ ቤት እናምረሐ ዘዕለለኒ ብዙሕ እዩ። ንሱ በቲ ኣብ ሙዚቃ ዘለዎ ፍልጠት: በቲ ውዑይ ዝኾነ ባህሪኡ ኣሰንዩ ክነግረኒ ከሎ እምብዛ ተምሳጥ የሕድረለይ። ነቐፌታ ከኣ የዘውትር ኔሩ። “ከምዚ ክግበር ኣለዎን ኔርዎን” ዝብሎ መሊኡ እዩ። ካብ ኣፍልጦን ቅንዕናን ዝብገስ ስለ’ቲ ምዃኑ እፈትወሉ እየ።
ብዛዕባ መምህር ይስሓቕ እቲ ዝፈልጦ ድሩት’ኳ እንተኾነ: ንኻልኦት ግዱሳት ነበብቲ ዘሎኒ ከካፍል እየ መሪጸ። ነዚ ዝደረኸትኒ ሓፍትና ኣኽበረት ግርማይ እያ። ንሳ ኣብዚ ለንቅነ ነዚ መሰነይታ ስእሊ ጌረዮ ዘሎኹ ኣሰንያ ዝኽራ ኣሓዲሳ። ንኣኪ ብዙሕ’የ ዘመስግና – ስለ ዝኽራን ስእላን!
ናብቲ ኣበርክቶን ሱታፌን መምህር ይስሓቕ ክሓልፍ።
* “ገረንሲት ሩባ ሞት” ዘርእስታ መጽሓፍ ኣብ ስሳታት ኣቢላ እተሓትመት እያ። ደራሲኣ መምህር ይስሓቕ ኣብርሃም ባዕሉ እዩ ዝነበረ። መምህር ይስሓቕ ነዛ መጽሓፍ ቅድሚ ንሜዳ ክጋደል ኢሉ ምውጽኡ እዩ ዝጸሓፋ።
* መምህር ይስሓቕ ተኸታሊ እምነት ፕሮቶስታንት (ከኒሻ) ከም ምዃኑ መጠን ኣማኢት መዝሙራት ዘሚሩን ኣዘሚሩን እዩ።
* ኣብ ግዜ ሓርነታዊ ቃልሲ ኣብ ሙዚቃ ብፍላይ ድማ ኣብ መዛሙር ምፍራይን ምስናድን ዝለዓለ ተራ ተጻዊቱ። ንኣብነት እቲ ናይ ቀደም ኣብ ግዜ ስሳታት ዝዝመር ዝነበረ እንደገና ብምጽዋት ንተማሃሮ የዘምሮም ኔሩ።
– “ሰላም ሰላም ሰላም ኦሆ ቤት ትምህርተይ
ካባኺ ተፈልየ: ክረምቲ ዕረፍተይ…”
– “ኢሳቕ ሓወይ ደቂስካ… ደውላ ቃጭላ.. ዲን ዶን ዳን”
ወዘተ!
እዝን ኣዝዩ ብዙሕ መዛሙራትን ኣብ ከብሕታት ሙዚቃ ላይብረሪ ናይ ድምጺ ሓፋሽ ኣሎ። መደብ ቈልዑ ኣብ ራድዮ ከነዳሉ እንከሎና ንፍንዎ ኔርና።
– ሓደ ካብቶም ግዱሳት መማህራን ቤት ትምህርቲ ሰውራ ኰይኑ ንብዙሓት ሰብ ሰውራ ፍልጠቱ ኣጨቢጡን በዚ ዝንባሌ ንኽቕጽሉ ደሪኹን።
* “ኤርትራ ኤርትራ: ብዓል ደማ እናልቀሰ ንኽለቃ
ህይወትና ነሕልፈላ ኣሎና ደቃ”
እዚኣ ኣብ ግዜ ሜዳ ትዝመር ዝነበረት እያ። ብድሕሪ ሓርነት ድማ በዚ ዝስዕብ ተማሓይሻ ቀሪባ:-
“ኤርትራ ኤርትራ ብዓል ደማ እናልቀሰ ተደምሲሱ
መስዋእታ ብሓርነት ተደቢሱ”
እምብኣር ኩልና ከም ዘይንስሕቶ እዚኣ ድሮ ሃገራዊ መዝሙር ኰይና ትርከብ። ጸሓፊ ግጥሚ ሰሎሞን ጸሃየ ክኸውን እንከሎ: ዜማ ኸ ብመን ዝተዳለወት ይመስለኩም? መምህር ይስሓቕ ኣብርሃም ምስ ኣሮን (ወዲ ነብያት) ብምዃን እዮም ዜማ ኣውጺኦሙላ።
* ድሕሪ ሓርነት ኣብ መጀመርያ ቴስዓታት ትምህርቲ ሙዚቃ ኣብ ዩኒቨርስቲ ኣስመራ ተኣታትዩ ኔሩ። ቀንዲ መምህር ዝነበረ ኣብቲ እዋን ከኣ መምህር ይስሓቕ እዩ።
* ኣብ ትካል ምስልጣን መማህራን ከም መምህር ሙዚቃ ንነዊሕ ዓመታት ምሂሩ እዩ።
* መምህር ይስሓቕ ሓደ ካብ መስረትን ኣካየድትን ማሕበር ሙዚቀኛታት ኤርትራ እዩ።
* ሓንቲ ናይ መዝሙር ካሴት ብዛዕባ ስውኣት እትጠቅስ እውን ኣሕቲቱሙ ተዘርጊሓ እያ።
* መምህር ይስሓቕ ኣብርሃም ብዝሓደሮ ሕማም ብመስዋእቲ ተፈልዩና እዩ። እዚ ንኽብርቲ ብዓልቲ ቤቱ: ቤተሰቡ: ተጋደልቲ: ተማሃሮ: ሙዚቀኛታትን ኣፍቀርቲ ስነጥበብን ዓቢ ክሳራ ከም ዝኾነ ኣይሰሓትን። ኣምላኽ ኣብ ገነቱ ይቀበሎ።
እዚ ኩሉ ዝጠቐስኩዎ ኣበርክቶ: ካብቲ መምህር ይስሓቕ ኣብርሃም ዝፈጸሞን ዘፍረዮን ብኣዝዩ ውሑድ መጠን እዩ።
እታ ሓንቲ ሕቶ እትመላለሰኒ ናብቶም ብቐረባ ንመምህር ይስሓቕ ዝፈልጡዎ ዝቐንዐት እያ።
“ክሳብ ሕጂ ምስቲ ዕዙዝ ኣበርክቶኡ ብዝዳረግ መዳዩ መምህር ይስሓቕ ተጠቒሱ ዶ ትብሉ? ስለምንታይ?” ብዛዕባ መምህር ይስሃቕ ክእለቱን ኣበርክቶኡን እቶም ብዙሕ ብዛዕባኡ እትፈልጡ ኣብዝን ኣብ ካልእ ኣጋጣሚታትን ተወሳኺ ክትብሉና ተስፋ እገብር።
ሰሰናዩ ንኣኻትኩም ግዱሳት ነበብቲ!
ይስሓቕ ኣብርሃም
ሳስካቸዋን – ካናዳ
