ደራሲ እስጢፋኖስ ገብረሚካኤል (ሃንችባክ)
መበል 123 ክፋል
ካስትሮ፡ ምስ ገለ ብጾት ኣብ ዓራርብ ዝነበረ ንብረት ነስመራ ብጽፉፍ ኣገባብ ዝኣትወሉ ኵነታት ንምፍጣር ምስ ብጾቱ ለይትን መዓልትን ይሰርሕ ነይሩ። ንገለ ካብቶም ብዕድመ ዝነኣሱ ኣባላት፡ በብተራ ስድራኦም ርእዮም ክምለሱ እናፍቀደ ምስቶም ዝተረፉ ብዘይ ዕረፍቲ ሰሪሑ። ብዙሓት ካብቶም ዝኸዱ ኣብ ዝተወሰነሎም ግዜ ይመጽኡ ስለ ዘይነበሩ ግን ምስ ብጾቱ ኣብ ዓራርብ ክድንጒ ግድነት ኮይኑዎ። ኣብ መጀመርያ ወርሒ ሸሞንተ እቲ ስራሕ ትንፋስ ክህብ ምስ ጀመረ፡ ንብረት ዝሕልዉ ብጾት ሓዲጉ ምስ ካልኣዩ ነስመራ ነቐለ። ቀዳም መዓልቲ ሰዓት ሓደ ድማ ብሓንቲ ዶሮና ዝተሸፈነት ቶዮታ ደበኽ በለ። ጐረባብትን ናይ ርሑቕን ቀረባን ዘመድ መዓስ ከም ዝሰምዑ ነታ ገዛ ብቕጽበት ኣዕለቕለቑዋ። ገዛ ዓቢ ውራይ እተእንገድ ዘላ መሰለት። መለስ ብወገኑ ምስ ኣቦኡ ተሓቝፉ፡ ዓሰርተ ግዜ ንሽጉጥ ኣቦኡ ክሕዛን ክተናኽፋን ዕረፍቲ ሰኣነ። መዓስ ንሱ ጥራይ፡ ንደገ ወጺኡ ናብቶም ኣብ ጽርግያ ዝጻወቱ ዝነበሩ መዛኑኡ ብምኻድ፡ “ናይ ባባ ሽጉጥ ሓዳስ’ያ፡ ጠያይታ ድማ ክበዝሕ!” እናበለ ክጀሃረሎም ትንፋሱ መሊቝ ወዓለ። እዋን ክሳብ ዝሓልፍ ድማ ምስ ኣቦኡ ኮፍ ኢሉ ወዓለ። ብኸምዚ ካብ ምሒር ታሕጓስ ዝተላዕለ ንሳልስቲ ዳርጋ ከይደቀሰ ቀነየ።
ኣብ ራብዕቱ ሰለሙን ኵነታት ስራሕ ክፈልጥ ንቤትጽሕፈት ሓይሊ ኤለትሪክ ኣምርሐ። ከዕርፍ ባህጊ’ኳ እንተ ነበሮ፡ ኣብ በለዛ ከም ዝተመደበን ምስቲ ዝነበረ ሓፈሻዊ ኵነታት ድሕሪ ሰሙን ስራሕ ክጅምር ከም ዘለዎን ተነግሮ። መዋእሉ ኣዕሪፉ ስለ ዘይፈልጥ ከም ሓቂ ከዕርፍ ብሂጉ ነይሩ። ብጾቱ ኣብ ጽዑቕ ስራሕ ተጸሚዶም ከለዉ ዕረፍቲ ይወሰኸኒ ክብል ስለ ዘይተራእዮ ግን ኣብኡ ንዝጸንሖ ሓደ ብጻይ ለኪሙ ጕዕዞኡ ነስመራ ኣቕንዐ። በታ ዝተዋህበቶ ቍራጽ ወረቐት መሳርፍ ክማላእ ንዕዳጋ ሓሙስ ተኣልዩ ድማ ሓርጭ፡ ሽኮር፡ ዓደስ፡ ዘይቲ ኣብ መኪናኡ ጽዒኑ፡ ኣጋ ሰዓት ዓሰርተ ገዝኡ በጽሐ።
መኪና ኣብ ኣፍደገ ገዛ ደው ኣቢሉዋ እናወረደ ከሎ፡ ሓደ ሰብ ማዕጾ ክዅሕኵሕ ጸንሖ። ገጹ ምስ ረኣዮ፡ “እሂ’ታ ሓረካ፡ እዚ ገዛውትና ደኣ ትፈልጦ ዲኻ?” ክብል እናተገረመ ሰዓሞ። በጋጣሚ ኣብ ቤትትምህርቲ ካድር ኣብ ሓደ ዙርያ እዮም ነይሮም። ኣብ ናይ ሓረካ ይኹን ናይ ጀብሃ ታሪኽ ክበጽሑ ከለዉ ድማ ዝወዓለ ይንገርካ ስለ ዝኾነ፡ ሓረካ ግለጽ ይብሃል ስለ ዝነበረ፡ ኩላቶም ኣብ ሓሙሻይ ዙርያ ካድር ዝነበሩ ደቂ ኮርሱ በቲ ገርሃዊ መልሱን ፍሕሹው ኣቀራርባኡን ኣይርስዑዎን’ዮም። ምስ ሰለሙን ግን ኣብ ክፍሊ ሕርሻ ከሎ ጸጸኒሖም ይራኸቡ ነይሮም ጥራይ ዘይኮነ፡ ኣቦይ ተኽለ ንዓራርብ ምስ ተቐየሩ፡ ቅልቅል ይብሎም ስለ ዝነበረ ጽቡቕ ሌላ’ዩ ነይሩዎም።
“ኣንታ ካስትሮ ከም ቦታ’ኳ ኣብ ከረን’የ ዘለኹ፡ ሕጂ ግን ቀደም ዝወለድኩዋ ቈልዓ ስለ ዝነበረትኒ ደሃያ ክገብር’የ መጺአ። ሎሚ ኣብ ሓደ እንዳ ዘመድ ውራይ ነይሩስ፡ እናተመሳሕኩ ከለኹ ብዘረባ ዘረባ ናይ ቀደም ዕላል ነልዕል’ሞ፡ ሓደ ምሉእ ህይወቱ ኣብ ኣዲስኣበባ ታክሲስታ ዝነበረ ወዲ ዓድና፡ ‘ጓልካ ክንዲ ሰብ ኣኺላ ሓዳር ገይራ’ላ’ ኢሉ ምስ ኣበሰረኒ፡ ጠዋሊ ካብታ መኣዲ ተበጊሰ። ኣብ ሎሚ በጺሑ ቁም ነገር ገይሩ’ምበር ሓደ ስሑው’ዩ ነይሩ። ታሕጓስ ዘይገብሮ የብሉን ንሓደ በዓል ታክሲ ዕስራ ቅርሺ ከፊለ እንሃልካ ደበኽ ኢለ፡” በሎ ናብቲ ጻህያይ ዝበዝሖ ጀርዲን እናጠመተ።
“እዚ ቪላ’ዚ ናይ ሲኞር ኤንሪኮ ከሎ ጂያርዲኔረ እናሰራሕኩ ከለኹ እየ ዝፈልጦ። ኣምላኽ ዕድመ እንተ ሂቡካ ብዙሕ ኢኻ ትርእን ትሰምዕን። ሽዑ ይትረፍ ንውሽጢ ገዛ ክኣቱ፡ ነዚ ኣታኽልቲ ማይ እናስተኹ ከም ኣጋጣሚ እንተ ዘኒቡ፡ ናብዛ ገበላ ንኽኣቱ እፈርሕ ነይረ። ከምዚ ሎሚ ከይኮነ ዓርከይ ጥልያን ጎይቶት’ዮም ነይሮም። እዚ ኣታኽልቲ ግን ማይ ስኢኑ ክባላሾ ቀሪቡ። ምዃን ማይ ንሰብ ዘይተረኽበዶ ንተኽሊ ክርከብ? ህዝቢ ተዋሪዱ’ንድዩ ነይሩ። እዛ ትርእያ ዘለኻ ካብዛ ስየ ንየማን ዘላ ኣውሊዕ ባዕለይ ዝተኸልኩዋ’ያ። እዛ ኣብ ማዕዶኣ ዘላ ታህሰስ ግን ወላ ኣይዝክራን። ምናልባሽ ኤንሪኮ ብድሕረይ ዝተኸላ’ያ ትኽውን።”
ካስትሮ ዘረባኡ ክሳዕ ዝውድእ ብዓቕሊ ክጽበዮ ጸኒሑ፡ ቦታ ተጋግዩ ኣሎ ኢሉ ስለ ዝገመተ፡ ሓሳባቱ ከይደምደመ ከሎ፡ “ጽቡቕ ኣለኻ፡ ኤንሪኮ ንዓዱ ክኸይድ ከሎ ነቦይ’ዩ ሸይጡሉ” በሎ።
“ሓቅኻ ኣብ ሶዳን ከለኹ ንሓደ ሓበሻ ሸይጡዎ ከይዱ ክብሉ ሰሚዐ ነይረ። ንምዃኑ ኣብዚ ካንሸሎ ንስኻ ጥራይ ዲኻ ዘለኻ?”
“ኣብዚ ቦታ ብጀካና ሰብ የሎን፡ ተጋጊኻ ከይትህሉ። ምናልባሽ ቀደም ኣብዚ ሰርቪስ ዝተኻረዩ ሰባት እንተ ነይሮም ዝፈለጥኩዎ ነገር የሎን። መን ይፈልጥ ጓልካ ኣብዚ ከባቢ እንተ’ልያ ግን ድሕሪ ምሳሕ ቀስ ኢልና ነዘን ጐረባብቲ ንሓትት። ሳላ ደርጊ ክንደይ ሰብ ድዩ ፋሕ ብትን ኢሉ፡ ኣብዚታት ኣላ እንተኾይና ግን ናበይ ክተብል ኢላ ክንረኽባ ኢና።”
“እዛ ዝብለካ ጓለይ ቅድም ኣብ ኣዲስኣበባ እያ ነይራ። ደሓር ግን ነስመራ መጺኣ ኣብ ሓደ ፋርማቺያ ትሰርሕ ነይራ ኢሉዋ። ምስ ምንዋሕ ግዜ ተጋግዩ ከይህሉ’ምበር ኣብዚ’ዩ ሓቢሩኒ። ምዃን ክንደይ ሽግር’ንድዩ ሓሊፉ፡ መን ይፈልጥ መነባብሮ ሓሲሙዋ ገዛ ቀይራ’ውን ትኸውን፡” እናበለ ደድሕሪ ካስትሮ ሰዓበ።
ንውሽጢ ገዛ ኣትዮም ኣእጋሮም ምስ ሰበሩ፡ ሮዛ ኣብ ክሽነ ጸኒሓ ንሳሎን ኣተወት። ሓረካ መልክዓ ተሓቢሩ ስለ ዝነበረ ርእይ ምሰ’በላ፡ ሰብነቱ ግንብንብ በሎ። ክስዕማ ተደናደነ።
“ሰላም በልዮ፡ ብጻይ ሓረካ እዩ፡” በላ ካስትሮ።
ድሕሪ ሰላምታ፡ ሓረካ ብድድ ኢሉ ብምትሳእ፡ “ኣቦኺ መን ይብሃል?” ክብል ተወከሳ ኣዒንቱ ተኺሉ እናጠመታ።
ሮዛ በቲ ሃንደበታዊ ሕቶኡ ተገሪማ ኣብ ዘላቶ ፈዚዛ ዝን ድሕሪ ምባል፡ “መዓሾ እዩ ዝብሃል፡” በለቶ ብውሽጣ ገለ ርሕቕ ዝበለ ዘመድዶ ኮይኑ ኢላ እናሓሰበት። ሓረካ መልሳ ክሰምዕን ሓኒቑ ክስዕማን ሓደ ኮነ። ካስትሮ፡ ብጀካ ብሳጓኡ ብስሙ ይፈልጦ ስለ ዘየነበረ ነገራቱ ምርዳእ ሰኣኖ። ሓረካ ኣብ ሰውራ ዝበለየ ኣዝዩ ቅኑዕ ሰብ ኮይኑ፡ ምስ ሰብ ሕዉስ፡ ጕርሒ ዘይፈልጥ ክነሱ፡ ሓደሓደ ግዜ ቍሩብ ዘረባ ከም ስዕር የብሎ እዩ።
ካስትሮ ጋን ተሰሪሑ፡ “እዚ ሓረካ ብጥዕናኡ ድዩ! ክሳዕ ክንድዚ ድዩ’ዚ ማህረምቱ?” በለ ብውሽጡ። ኣማራጺ ስለ ዘይነበሮ ተሰዓዒሞም ክሳዕ ዝውድኡ ከም ሓወልቲ ደሪቑ ክጽበዮም ተገደደ።
ሓረካ ነታ ጓሉ ዝመሰለቶ ሮዛ ስዒሙ ምስ ወድአ፡ ሮዛ ካበይ ከምጽኦ እየ ኢላ እናተጨነቐት ገጻ ገልቢጣ ንውሽጢ ገዛ ብምምራሕ ምሳሕ ሒዛ ተመልሰት። መኣዲ ምስ ተቐረበ ግን ሓረካ መግቢ ኣይተራእዮን። ኣኺሉዎ ንሮዛ ጥራይ ይጥመት ነበረ። “ወይጉድ!” ኢሉ ዘረባኡ ብምጅማር፡ እንጌራ እናበልዑ ታሪኽ ዝማም፡ ብሰንኪ ፖለቲካዊ ንጥፈታቱ ዘጋጠሞ ሽግር፡ ኣብ ጀብሃ ዘሕለፎ ህይወት፡ ምፍላይ ህዝባዊ ሓይልታትን ወዘተ ዘጠቓለለ ነዊሕ ታሪኹ ኣሕጽር ኣቢሉ ዘርዘረ። ሮዛ ነቲ ታሪኽ ናብ ምስሊ ተቐዪራ ክትሰምዖ ከላ ናይ ሓጐስ ንብዓት ኣብ መዓጓጉርታ ጸረር ክብል ይርአ ነበረ። ሓረካ ታሪኹ ምስ ወድአ ብጥዑም ዕላል ዝተሰነየት ቡን ፈሊሓ ተሰትየት።
ካስትሮ ኣብ መንቀራቕሮ ከም ዝኣተወ እንስሳ ኣይንላዕሊ ኣይንታሕቲ ኮነ። ናብ ዝግብ ኣብ ዝመጽኣትሉ እዋን፡ ጓል መን ምዃና ክነግራ ድንዕ ኢሉ ነይሩ። ኪዳን ምጥላም ኮይኑዎ ግን ኣጽቂጡ። ኣብ ኣቑርደት’ውን ተመሳሳሊ ስጕምቲ ወሲዱ። ሕጂ ሮዛ ጓል ባሻይ ተስፋልደት ክነሳ፡ ሓረካ ጓለይ ክብላ እናሰምዐ ከሎ ምጽቃጥ ንባሻይ ምጥላም ኮይኑ ተሰምዖ። ምድረሰማይ ጨሪሹ ተገላበጦ። ዝሸይን ተመሲሉ ንዓይኒምድሪ ድሕሪ ምኻድ ነዊሕ ሓሰበ። ኣብ መወዳእታ ግን ሮዛ ነቦይ ረኺበዮ ኢላ እናሓሰበት ከላ፡ ኣቦኺ ነፍስሄር ባሻይ ተስፋልደት’ምበር መዓሾ ኣይኮነን ብምባል ኣብ ሓዲሽ ረጽሚ ከእትዋ ነፍሱ ምግባር ኣብዩዎ ጥራይ ዘይኮነ ሃው ዝበለ ጸድፊ ኮይኑ ተሰምዖ። ከም እትቕየሞ’ውን ተረዲኡዎ። ስለዝኾነ፡ እቲ ንመዋእል ሰቲሩዎ ዝጸንሐ ምስጢር ብምዕቃብ ባሻይ ተስፋልደት ኣብ ዘእተዉዎ ኪዳን ክጸንዕ መረጸ።
መበል 124 ክፋል ይቕጽል
