ሮዛን ሰሌን

ደራሲ እስጢፋኖስ ገብረሚካኤል (ሃንችባክ)

መበል 74 ክፋል

ካስትሮ ከም ልማዱ ወጋሕታ ተበራበረ። ኣብ ጥዑም ድቃስ ከም ዘላ ተዓዚቡ ቍሩብ ክትድቅስ ሓደጋ። ሰዓት ሽዱሽተ ምስ ኣኸለ ጸሓይ ከየርከበን መታን ክብገሳ፡ “ሮዛ፡” ኢሉ ነውነዋ።

ብብዕግግታ፡ “ወጊሑ ድዩ ሰሌ ሓወይ?” በለቶ ዓይና እናሓሰየት። ሰዓታ ርእያ፡ “ገና ሰዓት ሽዱሽተ እዩ’ኮ ዘሎ። ሰዓት ሸውዓተ ክሳዕ ዝኣክል በጃኻ ሕቝፍ ኣቢልካኒ ደቅስ፡” ኢላ ኣብ ግንባሩ ሰዓመቶ።

“ቈሪስክን ጸሓይ ከይመረረት’ባ ክትብገሳ፡” በላ። ሕልናኡ ግን ኣብ ክልተ ተመቒሉ ነበረ። በቲ ሓደ ድሌታ ከማልእ፡ በቲ ካልእ ድማ ካብ ጕዕዞኣ ከይትተኣጓጐል ተሰኪፉ። ኣብ ናይ መወዳእታ ደቒቕ ናይ ምፍልላዮም ግዜ ንዘልኣለም ዘይትርስዖ ኣሉታዊ ስምዒት ከይተሕድር ተሰኪፉ፡ ኣብቲ ናይ መጀመርያ ኣማራጺ ብምእታው ንጡፍ ግብረ መልሲ ኣርኣያ። ንገለ ደቓይቕ ንዅሉ ነገር ረሲዖም ዝኾነ ቃል ከየውጽኡ ክሰዓዓሙን ክደራረዙን ጸኒሖም፡ ንመወዳእታ ግዜ ውዕዉዕ ወሲብ ኣብ ምፍጻም ኣተዉ። ኣብታ ክፍሊ ድማ ብዘይካ ትንፋሶም ድምጺ ዝብሃል ጠፍአ።

ልክዕ ሰዓት ሸውዓተ ምስ ኣኸለ ካስትሮ፡ “ንተንስእ ሮዛ፡” እናበለ ካብ ንእዲ ብምውራድ ክዳውንታ ሰው ኣቢሉላ ንሱ’ውን ክኽደን ጀመረ። ሮዛ ክትትስእ ድሌት ኣይነበራን። ካስትሮ ትርር ኢሉ ምስ ገንሓ ግን ማእደድ እናበለት ክዳውንታ ተኸዲና ካብ ንእዲ ድሕሪ ምውራድ ገጻ ተሓጽበት። ገለ ኣቕሓ ከይትርስዕ ተሰኪፋ ነታ ክፍሊ ብዓይና ኰሊላ ድማ ከይፈተወት ገፈፍ እናበለት ደድሕሪኡ ሰዓበት። ተመራሪሖም ኣብ ህድሞ ክኣትዉ ከለዉ፡ ድሮ ጸሓይ በሪቓ፡ ወ/ሮ ገብርኤላ ድማ ቡነን ሰትየን ጸንሖኦም። “እሂ’ታ ካስትሮ፡ ወጋሕታ ክትስእ’የ ኢልካ ከም ዘይፈከርካስ ከምዞም ቡርጅዋታት ኣስመራ ጸሓይ በጣዕጣዕ ክሳዕ ትብል በጥ ኢልካ ተርፍድ፡” በሎ ጫረ በተን ደቀቕቲ ኣስናኑ እናሰሓቐ።

ኣብ መንጎ ኣቶ በራኺ፡ ከመይ ኣለኻ’ታ ወዲሓውተይ፡ ብቐደማይ ተሃዊኸ’ንድየ ከየረከብኩኻ ከይደ፡” ኢሎም ክስዕሙዎ ስለ ዝጀመሩ ንጫረ ክምልሰሉ ዕድል ኣይረኸበን፡ ኣይተገደሰሉን’ውን። ቍርሲ ድሕሪ ምብልዖም፡ ሮዛ ንውሻጠ ኣትያ ክዳና ቀያይራ፡ ጸጕራ ጠቕሊላ ተመልሰት። ምብጋስ ድማ ኮነ።

ኣቶ በራኺ፡ “ንኺድ ጸሓይ ከይተርክበና፡ ምእንቲ ርእሱ ብጸሎት ኢና ንምለስ’ምበር ኣይግድን ኣቕቲርና ኣለና፡” ኢሎም በትሮም ኣልዓሉ። ሮዛን ካስትሮን ንዘረባኦም ተቐቢሎም ኣቐዲሞም ካብ ገዛ ወጽኡ።

ወ/ሮ ገብርኤላ፡ “በሊ ደሓን ቀንዪ’ዛ ጓለይ፡ ኣብ ካሕሳኺ የውዕለና። ከም ገለ ነስመራ እንተ መጻእኪ ግን ከይረኣኽና ከይትኸዲ፡” ኢለን ንምሕረት ገዝአን ሓቢረን ክፋነዋኣ ጸኒሐን፡ ናብ ሮዛ ቍሊሕ ብምባል፡ “ሮዛ፡ ሃየ’ባ ንምሕረት ደሓን ቀንዪ በልያ፡” ኢለን ዘምቢለን ኣልዓላ።

ሮዛ፡ “እዋይ! ከም ገለ’ንድየ ኣስጊለ፡” ድሕሪ ምባል ደጋጊማ ብምስዓምን ወ/ሮ ገብርኤላ ካብ ዝበልኦ ዘይፍለ ለበዋ ሂባን ተፋነወታ።

ኣብ መፈላለዪ ጽርግያ ክሳብ ዝበጽሑ፡ ኣቶ በራኺ ምስ ወ/ሮ ገብርኤላን ጫረን እናመርሑ ክጐዓዙ ከለዉ፡ ሮዛን ሰሌን ድማ እናዕለሉ ይስዕቡዎም ነይሮም። ካስትሮ ኣብ ግዜ ምፍልላዮም ሮዛ ንብዓት ከይስዕራ ሰጊኡ፡ “ስምዕኒ ሮዛ፡ ክንፈላለ ከለና ክተዅርዕኒ ኣለኪ። ከም ቈልዓ ሕንቕንቕ ኣይትበሊ በጃኺ። እናሰሓቕና ብፍሕሹው መንፈስ ንፈላለ፡” ኢሉ መዓዳ።

ጽርግያ ሒዞም ነዊሕ ምስ ከዱ ኣቶ በራኺ፡ “በሉ ሕጅስ ይኣኽለኩም። ንዓኻትኩም በዚኣ ትቐርበኩም፡” እናበሉ በትሮም ኣብ መሬት ተኺሎም ኣብ ወሰን ጽርግያ ደው በሉ።

ሮዛ እታ ትፈርሓ ዝነበረት መራር ህሞት ከም ዝኣኸለት ተረድኣ። ንብዓት ክቘጽራ ዝጀመራ ኣዒንታ ብሓቦ ገቲኣ፡ “ቻው ሰሌ ሓወይ፡ ብጽቡቕ የራኽበና፡” ኢላ ደጋጊማ ሰዓመቶ።

ካስትሮ፡ ሮዛ ሓቦ ምግባራ ሓጐስ እናተሰምዖ፡ “እሞ ንፍሬታ ጓለይ ድማ ስ. .ዕ. .ም ኣብልለይ! ንኹላቶም ከኣ ሰላም በልዮም። ብጽቡቕ የራኽበና፡” ብምባል ተፋንዩ ንወ/ሮ ገብርኤላ ብተመሳሳሊ ስዒሙ ተሰናበተን።

ወ/ሮ ገብርኤላ ብወገነን፡ “በሉ ኣደይ ማርያም ጽላል ኣይትኽላእኩም። ጽኑዕ የርግጽኩም። ብሰላም ምጽኡና’ዞም ደቀይ፡” ኢለን ተፋነውኦም።

ካስትሮን ጫረን ኣብ ዝነበሩዎ ደው ኢሎም ካብ ኣዒንቶም ክሳዕ ዝርሕቃ ክጥምቱወን ጸኒሖም፡ ወተሃደራዊ ትእዛዝ ከም ዝተዋህቦም፡ ቃል ከየምለቝ ገጾም ገልበጡ። ካብ ጽርግያ ንየማን ተጠውዮም ከኣ ንድፋዕ ዝቘርጹላ ቀጣን መንገዲ ሒዞም ተጓዕዙ። ብህሉው ወተሃደራዊ ኵነታት ዝጀመሩዎ ኣርእስቲ እናሰፍሐ ብምኻድ፡ ናብ ኵነታት ሶማል፡ ምትእትታው ሶቬት ሕብረት፡ ጀብሃን ጕዳይ ሓድነትን ስለ ዘእተዎም ከይተፈለጦም ኣብ ቦታኦም በጽሑ።

ኣቡ ዓፋን መጽሔት መሪሕ ከንብብ ጸኒሑ ግልጽ እንተ’በለ፡ ብማዕዶ ክመጽኡ ከለዉ ኣስተውዓለሎም። ኣብ ጥቓኡ ምስ ቀረቡ፡ “ኬፍ ሓልኩም ያጀማዓ፡ ኣጋይሽ ኣፋኒኹመንዶ?” እናበለ ብሰላምታ ኣእዳዎም ጨበጦም።

“መርዓት ኣፋኒናያ። እንቋዕ ኣይትርእያ ኣቡዓፋን፡ ማርያም ብህይወታ እያ ትመስል፡” በሎ ጫረ እናሰሓቐ።

ካስትሮ ንዘረባ ጫረ ብኣጋ ከምክን ብምሕሳብ፡ “ጠይብ ኣቡዓፋን፡ ድፋዕ ከመይ ቀንዩ፡ ኩላቶም ብጾትከ?” በሎ።

ኣቡዓፋን ንካስትሮ መልሲ ክህቦ ከይተገደሰ፡ ናብቲ ተኸዲኑዎ ዝነበረ ጽሩይ ስረን እናጠመተ፡ “ወላሂ ሓቅኻ’ለኻ ጫረ፡ ወላህላህ ኢሉ’ንድዩ መጺኡ፡” በሎ። ብፍላይ እዘን ጭሕሙ ወጨጕሩ እንተ ዝላጽየን ነይሩ መን ተጋዳላይ ክብሎ? ላኪን ካስትሮ ነጊረካ ነይረ ምሽ? እንታይ ዘህውኽ ኣሎካ? ኣብዚ ዝበሰለ ሩዝ ኣሎ ኢሎምካ ወላ እንታይ ሓሲብካ? ወላሂ ንስኻ ኣይትነፍዕን ኢኻ፡” ብምባል መፍቶ ጫረ ገበሮ።

“ክላ! ኣቡዓፋን ከኣ ካብ ጫረ ገዲድካ። ቍሩብ ዒብ ግበር ያኣኺ፡ ትም ኢልካ ንሱ ዝበሎ ዲኻ ትደግም?”

“ወላሂ ሓቀይ’የ ዝብለካ ዘለኹ። ጸላኢ ደቂሱ’ንድዩ ዘሎ፡ ባቸ ዲኹም ትብሉ ደቂ ኣስመራ። መሬት ባቸ እዩ ዘሎ። ድፋዕ ብላዕ ወስተ ከሎ ነዚ ኵነታት መዝሚዝካ ክትቅኒ ነይሩካ። ማሉ ወማለክ ክንድዚ ተብተብ ትብል? ምዃን ንስኻ እንታይ ጌርካ ጫረ እዩ ተጋግዩ።”

“ኣቡዓፋን ሳክት ኢኻ ትዛረብ ዘለኻ። ጠባዩ ከም ዘይትፈልጥስ ካስትሮ ክሰምዓካ ኢልካ ትሓስብ! ጽባሕ ንግሆ መሬት ቀውጢ ምስ ኮነት’ዩ ዝርድኦ።”

ክልቲኦም እናተቐባበሉ ምስ ሸደዱዎ ካብኣቶም መታን ክሃድም፡ “ኣቡዓፋን ድማ ባህሪ ጫረ ከም ዘይትፈልጥ ከምኡ ትብል ኣለኻ? ክላ ጥራይ መጽሔትካ ኣንብብ። ነዞም ብጾት ሰላም ክንብሎም ክንከይድ፡” ኢሉዎ ናብቶም ኣብ ማዕዶ ዝነበሩ ደቂ ጋንታኡ ገጹ ሰጐመ።

ሃለቃ ናፊቑዎ ስለ ዝቐነየ ብማዕዶ ክመጽእ ምስ ረኣዮ፡ “እሂ’ታ ካስትሮ፡ ጦፍ እኸይድ ኣለኹ ኢልካስ ጥንጥን ኣቢልካና ሽርብ ትብል? ኣጸሚኻና’ንዲኻ ቀኒኻ። ዋይ ማርያም ኣደይ!” ድሕሪ ምባል ሕውስ ምስ በሎም፡ ብናፍቖት ደጋጊሙ ሰዓሞ። ብድሕሪኡ ኣብ ቁምነገር ብምእታው፡ ብዛዕባ ሰበይቱን ኣደኡን ክሓቶ ጀመረ። በብሓደ ካልኦት ኣባላት ጋንታ ድማ ኣብ ናይ ሓባር ዕላል ኣትዮም ጸሓይ ክሳዕ ትመሮም ወጃዕ ክብሉ ኣርፈዱ።

*         *        *

ይቕጽል