ኣቤት ክቃጸጹ!
ኣቤት ክትሃላለኹ!!
“ንስኻ ጽረጎ“
“ንስኻ‘ምበር ጽረጎ”
ክ ብ ሃ ሃ ሉ፡
እቲ ደምበኦም’ዩ ዒባ ክረምቲ መሊኡ።
እቲ ዘስደምም‘ውን ነዘን ዝርካቦም
“ሓደ በትሪ” ዘይበጽሓ ኣሓኦም:
ጸባዋት ክንሰን ርቡሓት ክንሰን
ሰኣን ዝጥውረን ሰኣን ዘሐክመን
እቲ ዘሎወን ብጓጉድ ክንዲ ዝመጠዋ
ብሕማም ጉልሓይ‘የን ዝሳቐያ።
መኣስ እዚ ጥራይ፡
ህልኸኛታት ክጠማመቱ
ኣብቲ ደምበአን ዝወረደ ስቓይ
ካልእ ኣሎ ልዕሊ ሕማም ጉልሓይ።
እቶም ፈተውቲ ጸባ ጓሶተን
እቲ ዒባአን እንከይጸረጉለን
በረኻ ውዒለን ነዛ ክድቅሳ
እቲ‘ኳ ነፍሰን ‘ናጸልኣ
ወትሩ‘የን ኣብቲ ረግረግ ጭቃ።
ጽያፈን ተነጺፈን
ማይለይቲ ኣብዝባነን
ምሕላፍዶ ሓሊፈንኦ
ኣይከረም‘የን ከሪመንኦ።
እንሆ ከኣ ሎሚ
ድሕሪ‘ዚ ምሕላፍ ጸሊም ክረምቲ
ጭቃኡን ጨፈቃኡን ዝኸረመ ሰልሚ፡
ተኣኪቡ ተኣኪቡ
ተኣኪቡስ ተደርዲሩ
ናብ ድንግሊል ከኣ ተቐይሩ።
ኣበይ‘ሞ ሕጂ፡
ድንግሊል ንዘርብሕ ነገር
ኣይከም ኩቦ
ክጥቀምሉ ንመጎጎ
ኣይከም ዱኽዒ
ንግራቶም መስብሒ መለስለሲ፡
ከ ን ቱ!
ን ኸ ን ቱ !!
ን ከ ን ተ— መ ን ቱ!!!።
ብስንፍና ስንፍና እዞም ገዛ
እዞም ገዛ ፈተውቲ ጸባ:
ንደምበኦም ኩሳ ንጥሪቶም ኩሳ
ክጻረዱ፡ ክቋየቑ:
ክናብሑ: ክናጸዩ:
“ንስኻ‘ባ ጽረጎ“
“ንስኻ‘ምበር ጽረጎ”
ኛኽ ክብሃሃሉ ዘሕለፍዎ
ናይ ትማሊ ጭቃ እንከይጸረግዎ
ናይ ሎሚ ድንግሊል ደሪቑ
ንካልኣይ ክረምቲ እጽበ‘ሎ።
እቲ‘ኳ ኣይነበር
ምስ ሕማም ጉልሓይ ኣይነበር
እቲ‘ኳ አይነበር
ምስ ጭቃን ጨፈቃን ኣይነበር
ይዋእ ደኣ በዓል ሓምራ
ወሃብቲ ልግዐ ወሃብቲ ጸባ፡፡
እምበር ኣይነበር
ምስቲ መሪር ወቕቲ
እምበር ኣይነበር
ምስቲ ሓያል ቀዝሒ
እምበር ኣይነበር
ምስቲ ተካል ለይቲ
ካልኣይ ክረምቲ ደኣ እንታይ ኣሎዎ
ድሮ ‘ኳ ድሮ
እንሆ‘ንዶ ኣርኪ ብ …ዎ።
ዘፌ 2014
