ደሓን ሕደር ድቃስ

ብ’ዓቐን ዝሓለፎ ፡ ተባላዒ ረስኒ

ጸለሎ ከዲኖም ፡ ዳርትርኢት ንዓይኒ

ብሽታ ሕራሩ ተሃኖም ከውጽኡ

ብትርኢት ሕሰሙ ጽባቐ ክነስኡ ፡

ጉዳም’ዮም ክሓስሙ . . . . .

የሕሚሞም ክሓውዩ፡ ፍጹም ዘይጽገሙ።

እከይ ግብሮም ዘይውዳእ

ሃልሃልታ የሕሊፉስ፡ ኣብ ሞጉእ ክጉዳእ

ብ’ዲግታ ፡ካብ ቃንዝኡ ዜማ እንክፈጥሩ

ከም ክፋል ዕግበቶም ፡ ኣድራጋ እናደከሩ

ኣቤት’ወ ጭካኔኦም . . . . .

ቅጽዓተ እሳት መልክዑ ቀይሮም ፡

ሕሉፍ’ዚ ሰረቱ ታሪኽ ክፍኣት ግብሪ

ስቅያት ሃልሃልታ ፡ ስያሜ ቀያሪ

እቲ ምቕላው ፡ ምፍላሕ ተባሂሉ

ከምቲ ዝብህግዎ ምስሊ ምስ ፈጠሩ፡

ካብቲ ዘገርምን እቲ ዘደንጹን . . . . .

ሓድሕድ ይቀባበሉሉ ፡ ሰፊሮም ብዓቐን።

”ጥዑም ጥዑም”ይብሉ’ሞ፡ ፊት ፊት ምስ በልዎ

ነቲ ውሉፍ ኣእምሮኦም ግዲ መዓገስ ኮይንዎ

ግርም ግዜ ውን የሕልፉ፡ ዕላሎም ና’ደመቐ

ንሳቶም ና’ቆጸሩ ፡ ንሱ ና’ተጸንቀቐ !

ዕሽነት ከይንብሎ ተግባራቶም፡ ሰኣን ፍላጥ

ሰናይ ና’መሰሎም ልቢ ዘየሕብጥ. . . . . . .

ጸሓይ ኣብ ምዕራባ ፡ ኣጋ እዋን ዕረፍቲ

ለይቲ እንተርኪቡ   ተጸንቂቓ መዓልቲ ፡

ፈሊጦም’ዮም ነቒሎም ፡ ኣብ ኣጋ ምብጋስ

”ደሓን ሕደር” ኢሎም ፡ ተፋንዮሞ ንድቃስ።

 ማይኮ ተኽለ

12-2013

• ኣብ ቦኽሪ ውድድር ግጥሚ ዛራ ገጠምቲ:  ሓንቲ ካብ ብሉጻት 10  ኮይና ዝተዓወተት ግጥሚ።