ትንፋስ ኣልቦ ህያውያን
ኩልንትናዊ ዓይነታውያን
መስፈር ኣልቦ ዝቁጽሮም
ሰብ ግርማ ሰብ ክዳን ፡
ብባዕሎም ዝትረኽ ፡ሰብ ዝና -ምሁራን!
ውቁብ ኣሳእሎም
ሓድሕድ መወዳደሲ
ውልቃዊ ኣጀንደኦም
መበራበሪ-መደቀሲ ፡
ሓድሕድ ይነጋገዱ
ብኮመንትን ላይክን
ወጃዕ ድማ ይብሃሉ፡ ብኢንቦክስን ኦንላይንን፡፡
መኣከቢ’ለዎም ናይሓባር መውዓሊ
ተጋባዚ የብሉ ፡ ጋባዚ ከፋሊ
ንኣንፎም ይውዕሉ፡ ኣብ ኩለን ትካላት
ሓባራዊ ክለብ ፡በብዓይነተን ግሩፓት
ውልቃዊ ደኳኩን ፡ዝተፈላለዩ ፔጃት፡፡
ቀልጢፎም ‘ፋተዉ ምሒር ይፋቀሩ
ግዜ ነይወስደሎም ፡ ብሎክ ክጋበሩ!
ሓድሕድ ክምዓዓዱ ፡
ፍቃድ ዘየድልዮም
ምኽርታት ይልግሱ፡
ቢዶ(ቪድዮ)ቀቀሪጾም !
ይብኣሱ ድማ ፡ ሓድሕድ ይዋድኡ
ትጽርፍ ይውዕሉ ትንፋስ ይዋጽኡ
ፈጋኢ የብሉ ተፈጋኢ
ቀታሊ ኣብዘይብሉ መዋቲ፡
ኣዲኦም ትቁጸሮም ለባማት ዓረቅቲ ፡፡
ቀረጽ ዘይተኽፍል ፡ ኣገልግሎት ኣይትሓትት
ዜግነት ክትዕድል ፡ ዘይተብዝሕ ዋጢጥ
ደሞክራስያዊት መዲና
ዶብ ኣልቦ ከተሞኦም
ብዘይ ኣፈላላይ ማዕረ ተኣንግዶም
ማዕረ ትብጽሖም ፡ ማዕረ ተገልግሎም !
ንሳ ንዓኣቶም ሒዛ ፡ ትውቅብ ትምዕብል
እንተ ዜጋታታ’ሞ ፡ ይነብሩ ኣብ ሸንኮለል
ተምሳሌ ስላሴ ህያውያን ሙኻኖም
ፍጹም እናረስዑ ፡ ናይ ብሓቂ ምህላዎም
ዋኒኖም ዘንጊዖም ናይብሕሶት እንተነበሩ
ዘይትፈልጦ-ኣይፍለጥካ እንታይ ዘይገበሩ ፡፡
ፈሊጣቶም እምበር መኣስ ፈሊጦማ
ሃገረ-ፈይስቡክ ፡ ውቅብቲ ከተማ! ፡፡
ማይኮ
