ዋጋ ዘለዎ ህይወት ንበር!
ተዳሊኻ ዲኻ ኣይተዳለኻን እቲ ጉዳይ ሓደ መዓልቲ ምምጽኡ ዘይተርፍ’ዩ። ካብ ሕጂ ንደሓር እትበርቕ ጻሓይ ኣይክትህሉን’ያ ። ደቓይቕ፡ ሰዓታት፡ መዓልታት የለውን። ኩሉ እቲ ዝኣከብካዮ ነገራት ይኹን ዝረሳዕካዮም ናብ ካልእ ሰብ ክመሓላለፉ’ዮም። ሃብትኻ፡ ዝናኻ፡ ዓለማዊ ሓያልነትካ ማህሚኑ ዋጋ ዘይብሉ ክኸውን’ዩ። ናይ ውልቅኻ እንታይ እንታይ ከም ዝነበረ እንታይ እንታይ ዕዳ ክኽፈለካ ይግባእ ከም ዝነበረ ፍልልይ ኣየምጽእን። ቂምታኻ፡ኣይትተንክፉኒ ባሃላይ ባህሪኻ፡ ብድዐኻን ቀናእ ምዃንካን ፈጺሞም ክጠፍኡ ኢዮም። ከምኡውን ተስፋኻ፡ሓያል ናይ ድልየት እምነትካ፡ናይ መደባትካ ዝርዝር ግዜኦም ዝሓለፎም ክኾኑ’ዮም። ቅድም ኣዚዮም ዘይጽወሩ ዝመስሉኻ ዝነበሩ ስዕረታትን ዓወታትን በኒኖም ክጠፍኡ ኢዮም። ካበይ መጺእካ፧ ሕጉስ ህይወት ወይ ከርፋሕ ናብራ ኣሕሊፍካ ኣብ መወዳእታ ፍልልይ የብሉን። ጾታኻ፡ ይኹን ናይ ቆርበትካ ሕብሪ ክንዲ ፍረ ኣድሪውን ዘይቁጸር ክኸውን’ዩ። ስለዚ ንዓኻ ለውጢ ዘምጻኣልካ እንታ’ዩ ፧ ዝነበርካለን መዓልታት፡ ናይ ናብራኻ ዓቐን ብምንታይ ክምዘን ይከኣል። ኣብ መጻኢ ዋጋ ዝህልዎ ዕዉት ህይወትካ ዘይኮነ ኣብ ልቢ ደቂ ሰባት ዝውህለል ሰናይ ተግባርካ’ዩ። ለውጢ ዘምጽእ እንታይ እንታይ ዓዲግካ ዘይኮነ ኣብ ልዕሊ ደቂ ሰባት እንታይ ኣበርክቶ ጌርካ’ዩ። ኣብ መወዳእታ ለውጢ ዘምጽእ ክእለትካ ዘይኮነ ጠባይካ’ዩ። ክንደይ ሰባት ምፍናውካ ፈሊጦም ዘይኮነ፡ንስኻ ስለዝተፈለኻዮም ወትሩ ጽምዋ ከም ዝኾኖም። ኣብ ልቢ ዝፈትዉኻ ሰባት ዝተርፍ ዝኽሪ ክሳዕ ክንደይ ይጸንሕ ኣይኮነን። በዓል መንን ስለምንታይ ከምዝዝክሩኻን ደኣምበር። ዋጋ ዘለዎ ናብራ ብወዝቢ ኣይመጽን’ዩ። ኩነታት ዝውስኖ ጉዳይ ዘይኮነ ባዕልኻ መሪጽካ ትፍጽሞ’ዩ።
ስብሓት ገብረእዝጋብሄር
