ኣሎና ከኣ ንብል

እናፈለጥና፡ ዝዘራእናዮ ከም ንዓጽድ
ዝሃብናዮ ከም ዝህበና ግራት
መመሊስና ንወጽእ ካብ ሓዲድ፡
ንበታተን ከም ዘንቈረ ንህቢ
ንጐጃጀል ምእካብ ንኣቢ።

ከም ማእዶ ተጠሚርና
ኣብ ርሱን ከይነዅድድ
ደም ስኒ ውሒጥና ከይንተኣባበድ
ካብ ውሽጥና ተሰዲድና
ገለና ንስደድ ገለና ነሳድድ፡፡

ኣሎና ከኣ ንብል!

ሚሐና ከየለሊ ንእኽልን ክርዳድን
መንፊትና ከይፈሊ ሓሩጭን ሓሰርን
መዅባዕትና ጠፊኡዎ ጽራይን ግለትን
ኰይኑዎ ቋንቋና ጽያፍን ቅለትን!

ከይንተኣማመን ንከሓሓድ
ከይንተኣባበድ ንሰጓጐድ።

ኣሎና ከኣ ንብል!

ኣብ ቅርዓትና እንከሎ ኣማራጺ
ፍትሒ እናለመንና ኣብ ቅርዓት ዓማጺ
ሰላም እንከላ ኣደኣ ንፍትሒ
ንዓኣ ኣሳጒግና ንጓላ እነድሂ!

ኣሎና ከኣ ንብል፡
በሪ ህላወና እናተዓጽወ
በሪ ጥፍኣትና እናተራሕወ
ህላወና ይቝጸር ምስ ህላወ፡፡
ኣሎና ከኣ ንብል
እናተጓዓዝና ናብ መቓብር!

Berhane Gebrehiwot

27/06/2015