ምስለይ ተወጂሁ ብጸብሪ ሓሙኽሽታይ
ሳንጃ ኣእትያ ኣብ ኣምዑተይ የላን ምሳይ
ዕፋፎተይ ርእያ እንተመጸት፡ ኣሰር ኣንብርሉ ሬሳይ!
ከምዘይ መባህልቲ ኢሂን ሚሂን
ከምዘይ መሳግርቲ ደገን ውሽጥን
እዋን ፈላላዪ እዋን’ዩ ፍቕሪ
ድላዩ ገባሪ ቀታሊ መሓሪ
ልቢ ኣይኰነን ፍቕሪ
ልቦና ኣይኰነን ሰታሪ
እዋን’ዩ ኲሉ
እዋን’ዩ ከዋኒ
ሰብ ድማ እዋን ተመሓዝዩ
ልብን ኩላሊትን ጎስዩ
ንዂሉ ሒዙ ንዂሉ ኣቢሱ
ኣርኪብላ’ኳ ነዛ ዑንቂ
ነዛ ሓንቲ ኣፋ
ገፈል ወዲ ገፈል ጌሩ ክውትፋ።
ንሳ ድማ፥
ኣይ ብኢዳ ኣይ ብኣፋ
ንእዋን ደጊፋ!
ሞይቱ ምስ በልዋ ብፍቕራ ማሲኑ
ይሙት ኢላ መሊሳ ክዱን ብኽዱኑ!
ብኻ ሰሚዐያ “ይሙት” ኣብ ትብለሉ
እቲ ምቁር ድምጻ እኳ ምዓገብኩሉ፡
ደጊማ ኢሎሙኒ እታ ጓህሪ ዓይና
ጥልመት ድሕሪ ሞተይ ክትቅጽል ምዃና!
ውዒላቶ! ነገረ ስግንጢር
ድራር ኣየድርር ድቓስ ኣይፈጥር
ከመይ ዘየተክዝ ከመይ ዘየባህርር
“ክስዕስዕ’የ!” እኮ’ያ ኢላ ኣብ ናተይ መቓብር።
ኣብ ጐና ሰፊሩ፡ ሰይጣንወ ባዓል ሕማቕ ዛንታ
ልባ ደፊኑ ሸፊኑ ኣዒንታ
ገደል ኣዳልዩላ ንዕርበተ ሞታ!
ኣነኸሞ ነቲ ሰይጣን ክስዕሮ
ፈውሲ ሓሳድ ሱር ሳዕሮሳዕሮ
ብእምነተይ እምነቱ ከዕርቦ
ሞይተ ድየ ሞተይ ዝህቦ!?
ንሱ ደኣ ከምኡ እንድዩ ደልዩ
ፍቅረይ ኣላሕሊሑ ንእምነተይ ኣብልዩ
ፍቑራት ኣጥፊኡ ክነብር ፈርዩ፡
ሽዑ ኢለ ኔረየሞ፡
“ሬሳይ ቅበርዎ ኣብ ባሕሪ
ክትስዕስዕ እንከላ ከጥሕላ ፈጣሪ”
እዚ ግን ኣይበቕዖን ንተግባር መሓሪ
ሞት ብሞት ኣይክሓስን’ዩ
ነውሪ’ዩ ነውሪ!
ምሒረያ’ለኹ መሓሪ’ዩ ፍቕሪ!!
እምበር ከምቲ ግብራስ
ይትረፍዶ ኣነ ፍቅሪ ዝጽበ
ድበት ተደብ’ዩ ብኽሕደት ዝሞተ
እዮብ’ኳ እንተዀነ እዮብ እቲ ዘይክማህ
ንእምነት ዝመውት ጸሓይ ትብራህ ኣይትብራህ
ክሕደት ኣፍቃሪቱ እንተዝሰምዕ ኔሩ
ጋሊዶ መስርሐ ዓጽማ ሰባቢሩ!
ብኡ ጌሩ ድማ መቃበጻ ኔሩ!
እምነቱ ኣብ ልቡ መቆምያ ሓቂ ሒዙ
ካብ ሰማየሰማይ ሴፍ በርቂ መዚዙ
ምስቶም ሕንዘምንዚ ምስ ተመን ሓዊሱ
ምቖራረጻ መስለኒ ረጊጹ በፍራሱ!
ሰይጣን ድማ እልል ምበለ ሽዑ
ደም ፍቑራት ንብላሽ ኪዑ
እሞ ኣነስ ዓሻዶ
ነቲ መንገዱኸ እኸዶዶ?
በሉ ኣቱም ቀባሮ!
ትም ኢልኩም ኣይትቕበሩ ሬሳ ኣብ ጐዳጒዲ
ጽን ኢልኩም ስምዕዎ ድሌት እቲ መዋቲ።
እወ ስምዑ ምሕረት ዝፈልጥ’የ ምሕረት ነፍቃሪቱ
ሕማቕ ንዓርሱ ሕማቕ ንዝፈቱ
ሰኣን ዓቅሊ ሰኣን እቲ ብልሓቱ
ሰኣን’ቲ ትዕግስቲ ሰኣን’ቲ ፍልጠቱ
እንድኣሉ ሰብ ዝጋገ ኣብ ገደል ዝኣቱ
እሞ ኣነዶ ክስራዕ ምስኡ
ብተግባሩ ጸላም መጋብኡ
ንሳ ድማ ሓሪቓ እንድኣላ ሰይጣን’ውን ኣብጐና
ማቕ ሕሰም ጭካነ ተጎምጒማ
ንሳ ኣይነበረትን ንሳ
ኣኴስ ኔሩ ኣብ ትርኣሳ
እምበር ሞት ዶ ምወጸ ካብ ኣፋ
ንዓይዶ ምሃበት ኣሕሊፋ
ኣብ ጸገማ ዝድግፋ
ነታ ሞታ ባዕለይ ዝሓልፋ
እሞ ሕጂዶ ሰብ ምኳን ገዲፈ
ነታ ፍቕረይ ክህባ ኣሕሊፈ?
ይዝክሮ’የ ይዝክሮ
ነቲ ዝቐሰምክዎ ቅምሶ ፍቕሪ
ነቲ ናታ ጥዑም ነቲ ናታ ክብሪ
ንልስሉስ ምዕጉርታ ንኸንፈራ ሃሪ
ንውዑይ ኣካላ ወላህታዊ ጓህሪ።
ስለዚ ሬሳይ ኣይትቕበርዎ ኣብ ባሕሪ
ጽሓፍሉ ድማ ሞይቱ ኢልኩም ብፍቕሪ
ምልክት ኣንብርሉ ነዊሕ በትሪ
ኣብ ልዕሊ መቓብር ወጻኢ ካብ ባሕሪ!
ክትመጽእ’ያ ሽዑ ዑንቀይ እዛ ጽብቕቲ
መኽበሪት ቃላ ጸናዒት ኣብ ሓንቲ
ቃላ ከተኽብር ኮይና ምስ ‘ቶም ዛርቲ
ሬሳይ ኣይትቕበርዎ ኣብ ባሕሪ ኣብ ታሕቲ
ክትስዕስዕ እንከላ ከይትጥሕል ምእንቲ!!
መለስ ንጉሰ
