ከም’ታ…..ኣብነት ክትከውን
ንሰብ ልዕሊ ኽፍኣት ጽባቐ ክገዝኦ
በቲ’ውን ነቲ ቤት
ኣብ ዓመቱ ብሪሓን ክትነስዖ፣
ብዘይ ስፍሪ ዝውሕዝ ቈላሕታን
ካብ ነብሳን ትንፋሳን ዘፍኖ ሃገግታን
ኣብ’ቲ መናፊት ከይደፋፍኡ
እና’ሳሰየቶም ተኣኒና
ብጠለብ መለኮት – ጽባቐ
ቅርጻን ኵሉ-ምላን
ከይበቐቐ ዘርኢ ረቂቕ ተኸዲና፤
ክንደይ ምኩሕ ሃሃዲና
ኣዒንቲ ክትጨዊ ዓዓፊና
ኣብ ስቡሕ መድረኽ
ቀብዘርዘር ምባል ዘምሕረላ ጐርዞ
ጐርዞ ውድድር ቍንጅና፤
ንምንታይ ድየ ተሃኒነ ክርእየኪ ወትሩ
ሕቶ ዘይደልየሉ?
ዓይነይ ብዘይካኺ ስለዘይመልኣሉ
ልበይ ብድሕሬኺ ሰብ ስለዘይብሉ።
እንታይ ኢኺ ግን….
ናበይ ኢኺ ትኣትዊ ትወጺ
ተቕለውልዊ ካብ ሕቝፈይ ክትነፍጺ!?
በሊ ባህ ይበልኪ!
ምስ ተዓዘቡኒ
ወግሐ-ጸብሐ ከም ዕዋኖ
በዚ ’ናዃሕኳሕኩ ካንቸሎ-ኻንቸሎ
በቲ ክደልየኪ ኣንጐሎ-ኣንጐሎ፣
ናበይ ከም ዝዀንኪ’ንድዒ
ህዱእ ንፋስ እና’ናወጽኪ
“ሽ….ሹብ!” እትብልዮም ብዘይ ወግዒ
ትሓንንዮ ርእዮም ዝበሉኺ ስምዒ፤
“ናበይ’ያ ትሕምበብ ከም መንኰርኰር
እዛ ኾፍ ትኸብዳ – ሕምምቲ መዓኰር!”
እምበኣር ንስኺ
ክትከዲ……ክትከዲ
ኣነ ከም ኣመለይ
ከናዲ……ከናዲ
ሽግር ከም ምዃኑ ናይ ፍታሕ መንገዲ
ሓሳብ ጎፍ ኢሉኒ
ክትቅየሪ ዘኽእል – ኮፍ ምባል ክትለምዲ።
ፈውሱ ንዘይርከብ
ሓኪም ንዘይዓይዮ
ሓድ-ሓደ ግዜ
ንዘይጭበጥ ሕማም፡ ሕማም’ዩ ዘሕውዮ።
ስሙ፡ ትርጉሙ
ዓቂቡ፡ ተሰኪሙ
ዘንተእለት ጸኒዑ ከም ዝነብር ሓወልቲ
ኣፍቂሩ ዘይርብርብ ካብ ኰንኩ
ዘይሰድድ ዝሓዞ – በዓል ዛርቲ፤
ከምኡ ድማ
መቐረት ኮፍ ምባል መታን ክትብህግዮ
ቂምታ መዓኰር ውን ክተስተንትንዮ፤
ርህሩህ ጌታ ስለዝሰምዓኒ
ታቦቱ ጠፍጢፈ እንተ ለሚነዮ
ጽንቅቕ እንክብለኒ እቲ ዝምነዮ
“ያላ ዕጫኺ’ልዕሊ” ’ተዝብለኪ
መግሊ’ንጭዋ ዶ ምሓሸትኪ ኦሞሮድዮ!!?
ቦኽረ ገብረየሱስ
ሰነ 2015
